SAUNOAGA AUTU – Minisita o Taaloga & Alagaoa mo le Fiafia o Tagata i le tatalaina o le Taamilosaga o le Sheraton Aggie Greys Hotel & Bungalows King & Queen of Rugby 2024

SAMOA, September 12 - (12 Setema 2024 @ 9.00 am)

Susu lau Susuga le Ta’ita’i o le sauniga, Lau Susuga Rev: Nuuausala

Siutaia,

Afio Lau Afioga le Sui o le Fono o Sui Tofia, lau Afioga Tuiletufuga

Lemamea Ropati,

Afio Lau Afioga le Tamaita’i Palemia, Lau Afioga Fiame Naomi Mataafa

Afifio Minisita o le Kapeneta,

Afifio le Mamalu ma le Paia o le Valaaulia,

Le Paia i le Afioaga,

Le Afifio o Alosina ma Fua’ifale o Salevalasi, alalata’i le Faletolu ma le Vainalepa fa’apea le tausiga ia te oe Tuisamau,

Manatu o lea ua mapu i le sasaga le utugā taufa a tausala, auā le faapolo ma le faasagi i le Atua o Sapaota i lenei taeao fou, e pei ona gapatia ai lau susuga i le Taitai o le Sauniga, lau susuga i le Faafeagaiga.

Tau lava ina faaopoopo le agaga faafetai e pei ona faaleoina e le

fofoga o le aso. Faafetai tapena mālō sāuni. O lea lava ua e tapena

faa-fafine tō’aga le tapuaiga i le Atua i lenei taeao. Ia faafulu mai lagī le tōfā a lau susuga i le Faafeagaiga aua lou soifua galue e tautua le Atua ma lona finagalo. Ia saga faamanuia pea le Atua.Ua fa’amalo le soifua manuia, fa’amalo foi le folau, faamalo pale, malo le onosai ‘ao tau mamanu ma faufau mai lenei faamoemoe I aso ua alu.

O le asō, e le o se aso na fa’afuaveta, ae o le aso sa lupe ma atofa, sa faamemelo ma momo’o iai fa’alupe o naumati lagona o soo se Apia i Samoa ma le lalolagi atoa. Auā o lea ua atoa le 100 tausaga talu ona faavae le Kalapu Lakapi le afio’aga, le APIA MAROONS e pei ona lauiloa ma afua ai lenei taeao.

E taua tele mo le talafaasolopito o le afioaga ma polokalame ile asō, ona o le faamanatuina o le 100 tausaga, o se taimi umi pe a toe tomanatu I matati’a na ausia, o mea lelei ma anoa sa tutupu ma afua mai ona o le Kalapu Lakapi lenei.

O le Lakapi ma le Faipelega, o Taaloga ia e lua na malaga mai ma

Felela Malisi ina ua omai e faatu le latou aoga i Mulivai I le taimi

Muamua.

Ae o le tausaga e 1924, na lesitalaina ai kalapu Lakapi e 4, e pei o le

Apia Maroon, Vaiala Ulalei, Malisi ma le au a Foma’i, ma le

faamoemoega ina ia mafai ona faailogaina ai taaloga Faavaomalo ma le Au mai Fiti.

Le kalapu ma le Afioaga i Apia, e le ititi lo outou sao i le atinaeina o le taaloga e pele i loto ma agaga o le atunuu, tele alii o le Manu Samoa na fofoa atu iinei a latou taleni, o lea e afifio atu nisi o minisita na avea ma avefu’a I lau Manu Samoa, o fanau ua manuia o latou aiga ma taaalo i fafo, na afua mai i au polokalame atina’e ma le lelei ona aoaoina o au Au Lakapi.

O le Taamilosaga o le Sheraton Aggie Greys Hotel & Bungalows Apia Maroons King & Queen of Rugby Tournament, e le o se taimi muamua lenei ua faia ai, ae o le measili ma taua, o lea foi ua amanaia le sao ma le taumafaiga a nai tamaitai I le taaloga o le Lakapi, lea sa tatou faatuatuanai ma le amanaia I tausaga ua tuanai.

Molimauina i lenei vaiaso le umusaina o le galuega tele o le fautasi mo le afioaga, i le faitau atu i na mea uma, na matamata tetele mai ai lava le faamā’ite a le Kalapu lakapi a alo ma fanau a le afioaga.

Avea foi le faailogaina o lenei 100 tausaga e manatua ai nisi o tamalii, o toa magumagu sa latou faafaileleina le anoano o alo ma tamafanau a le afioaga i soo se taaloga sa tausiniō ai, ma e mautinoa lava o taumafaiga ma auaunaga o ananafi, lea ua tino ma aeae ai le asō.

Fai ai a’u ma sui o le Malo e faaleo le agaga o le faafetai ma le faamalo i le Komiti faafoe o lenei faamoemoe, faamalo le silasila mamao, faafetai tautua, faamalo faamaite I mea lelei ma le manatu i tupulaga fai’ae a le nuu ma le atunuu.

Mo le Taamilosaga I le asō, Ia faamanuia le Atua I ona laasaga uma, ia iai Lona filemu, ia maua e alii ma tamaitai uma o le a faatinoina taaloga le fiafia ma le agaga moni o lenei faamoemoe. Taalo i le poto ma le atamai, ae ia sili ona taalo e tusa ma le tulafono.

Le tatou nuu ma le afioaga I Apia, ia manuia tele le fa’amanatuina o le 100 tausaga talu ona fa’avae lau Kalapu Lakapi. Ia faaauau pea ona iai lona maopopoga ma ia tutupu mai ai nisi Manu Samoa I le lumanai, ma avea o se vaipuna e taulai atu iai alo ma fanau o le afioaga ma le atunuu, mo le faalauteleina o a latou tomai ma agavaa I lenei taleni.

Ua tapenaina e le tatou Malo se mealofa tupe mo lo tou faamoemoe i le faamanatuina o loo 100 o le Lakapi a le Apia Maroons.

I le ava ma le faaaloalo tele, oute fiafia e faailoa atu, ua tatala ‘aloaia nei le Taamilosaga o le Sheraton Aggie Greys Hotel & Bungalows King & Queen of Rugby 2024.

Soifua ma ia Manuia.

Ata Pueina – Malo o Samoa (Leota Marc Membrere)

September 18, 2024